កែប៖ ថ្ងៃឈប់សម្រាកភ្ជុំបិណ្ឌ៣ថ្ងៃ ចាប់ពីថ្ងៃទីទី១៣-១៥ ខែតុលា ឆ្នាំ២០២៣ ខេត្តកែបទទួលបានភ្ញៀវទេសចរជាតិ និងអន្តរជាតិចំនួន ៦៣ ០៦៦នាក់ ក្នុងនោះភ្ញៀវជាតិ ៦២ ១៩០នាក់ និងភ្ញៀវបរទេស ៨៧៦នាក់។ នេះបើតាមការបញ្ជាក់ឱ្យដឹងពីមន្ទីរទេសចរណ៍ខេត្តកែប។

ខេត្តកែប គឺជាខេត្តមួយដែលមានរមណីយដ្ឋានដ៏ទាក់ទាញ ក្នុងនោះមានឆ្នេរលិចទឹក កោះទន្សាយ ឆ្នេរអង្កោល ភ្នំវល្លិ៍ និងឧទ្យានកែប។ ខេត្តកែប ត្រូវបានរដ្ឋបាលខេត្តកែលម្អហេដ្ឋារចនាសម្ព័ន្ធដើម្បីចំណាប់អារម្មណ៍ភ្ញៀវទេសចរឱ្យមកលេងកម្សាន្តខេត្តជាប់សមុទ្រមួយនេះឱ្យកាន់តែច្រើន។

គូសបញ្ជាក់ថា បុណ្យសមុទ្រឆ្នាំនេះ ក៏នឹងធ្វើនៅខេត្តកែបរយៈពេល ៣ថ្ងៃចាប់ពីថ្ងៃទី០១-០៣ ខែធ្នូ ឆ្នាំ២០២៣ ខាងមុខនេះ ដោយមានការរៀបចំកម្មវិធីជាច្រើនដូចជា រត់ប្រណាំង និងប្រដាល់គុនខ្មែរ មហោស្រពម្ហូបអាហារ តាំងពិព័រណ៍សមិទ្ធផលនានា និងការប្រគំតន្ដ្រីមហាជនជាដើម៕